Pas një organizimi te jashtëzakonshëm vitin e shkuar në Shkup të Maqedonisë, Shoqata e Arkitektëve të Shqipërisë do ta sjellë këtë takim në Tiranë, me synim njohjen me zhvillimet e fundit arkitektonike në Shqipëri, njohjen dhe gërshetimin me karakteristikat dhe specifikat lokale të fushës së ndërtimit në tërësi me arkitekturën e inxhinierinë e vendeve rajonale, evropiane e më gjerë. Në të njëjtën kohë, ky eveniment unik kthehet në një shans të jashtëzakonshëm për arkitektët shqiptare, në një moment kur përballja me zhvillimet rajonale e globale e cila lidhet me disiplinën e arkitekturës dhe urbanistikës është kthyer në një domosdoshmëri.
Ky aktivitet do të organizohet më 20 shkurt 2018, në Hotel Plaza në Tiranë, e do të ndiqet nga mbi 200 arkitektë e profesionistë nga Shqipëria, Kosova e Maqedonia si dhe midis folësve do të ketë arkitektë të cilët paraqesin projektet e tyre ndërkombëtare nga 9 vende:
Shqipëria, Kosova, Bullgaria, Italia, Belgjika, Rumania, Irani, Maqedonia, Holanda dhe Mbretëria e Bashkuar.
SHARE Tirana 2018 organizohet bashkërisht nga Shoqata Kulturore PRO EVENT & Abplus events me seli ne Bukuresht si dhe 4 shoqata të mëdha kombëtare rajonale të arkitektëve:
Shoqata e Arkitektëve të Shqipërisë, Asociacioni e Arkitektëve të Kosovës, Shoqata e Arkitektëve të Maqedonisë, Dhoma e Arkitektëve në Bullgari dhe Urdhri i Arkitektëve të Rumanisë. Forumi ka si qëllim të dallojë dhe promovojë shembujt e praktikës më të mirë në arkitekturën bashkëkohore, për më tepër për të pasuruar rrjetin profesional nëpër botë me ndodhitë e fundit në këto vënde e më gjerë.
E veçanta e këtij forumi, ne raport me shume konferenca apo forume te zhvilluara se fundmi ne Shqipëri lidhur me arkitekturën, është fakti se ai fokusohet tek profesionisti, si dhe ne aplikimet e fundit ne fushën e projektimit e implementimit. Ky fakt, bën diferencën me evenimente te tjera me karakter vetëm akademik.
Forumi është konceptuar në dy ngjarje kryesore; një seri folësish shqiptare e nga rajoni qe përfaqësojnë studiot me ne zë te arkitekturës ne dekadën e fundit ne Shqipëri, Kosovë, Maqedoni e Bullgari do të ndërthuren me studiot dhe arkitektet të cilët kanë fituar çmimet më prestigjioze botërore të arkitekturës.
Gjithashtu një takim i dyte i quajtur “Junior Session” sjell me një ligjëratë pranë studenteve te arkitekturës në sallën e madhe të Universitetit Politeknik të Tiranës, përfaqësuesin e një prej studiove te arkitekturës me ne zë ne rang botëror, Zaha Hadid Architects si dhe arkitektë të tjerë.
Për Shoqatën e Arkitektëve të Shqipërisë, ky eveniment shënon një nga organizimet më të mëdha e më të rëndësishme të viteve të fundit të organizuara prej saj për vetë arkitektët dhe dashamirësit e arkitekturës në Shqipëri.
Përveç botes akademike e studenteve, forumi shfaqet si një moment tejet interesant e i veçantë për komunitetin e arkitekteve e urbanistëve shqiptare. Si të thuash, ka ardhur koha për tu ndalur pak e për të reflektuar mbi atë çka bëjmë e si e bëjmë, e për tu qasur ndryshe midis nesh, pse jo edhe në nivel ndërkombëtar.
Së pari, kjo qasje krijon hapjen për herë të parë në një audience ndërkombëtare, duke u dhënë mundësi pjesëmarrësve vendas të ndajnë eksperiencat e tyre dhe në të njëjtën kohë të përballen me koncepte, risi apo qëndrime alternative mbi çështje të lidhura me arkitekturën e projektimin urban.
Se dyti, ai kthehet ne një pike takimi mes komuniteteve lokale profesionale e përfaqësuesve te fushave me kualitet te lartë në biznesin e rëndësishëm të ndërtimit.
SHARE Tirana, do të arrijë të kontribuojë në pasurimin e agjendës kulturore të kryeqytetit, duke zgjuar interes të madh përtej komuniteteve thjesht profesionale.
